試過兩次 (兩件事大約相差5年左右)
第一次
當時和一班朋友去打保齡，隔幾條Link有一班人，其中有幾個不段眼望望咁望住我，當時都唔知咩事，
隔o左一陣，果班人其中有兩個女仔走過來問我，你唔係邊個邊個？(唔記得佢地叫我咩名了)
講o左一堆我唔明既o野，跟住我話：你地認錯人啦，我唔係你地所講的那位朋友
佢地死都唔信，以為我整估佢地，跟住我D朋友過來問咩事，之後大家解釋比佢地聽，
果兩個女仔先至肯走，但係佢地都抱住懷疑態度咁離開，返返自己個位度同佢地其他D朋友圍埋一齊討論，
其間不段地手指指咁指住我.....，我D朋友都話：唔通真係有個和你一樣樣的人存在？
第二次
有一次和一個朋友一齊去捐血，入到去時，我地話來捐血的，
個姑娘就同我講：你做咩又來捐血？你岩岩先捐o左，唔可以咁短時間捐兩次的
跟住我用手指指住自己個鼻講：我？！，我求先都無o黎過
我朋友都話：係呀，我地而家先o黎，之前都無o黎過
姑娘跟住就話：你求先的確有o黎過，不過唔係同呢位朋友o黎之嘛！係同另外一個朋友
我地問：姑娘你有無眼花呀，認錯人咋話？
果個姑娘跟住就拉o左另一個同事出來，問佢同事：妳認唔認得佢？
佢同事話：認得！岩岩佢先捐完血，呢度又唔係好多人，一眼見晒啦，你估我老人癡呆咩
跟住我就問：咁你求先講同我一樣樣o既人，走o左幾耐？
佢地話：10分鐘都唔夠
講完之後，其中一個姑娘就話：係喎，佢求先唔係著呢D衫架喎！除o左佢身邊o既朋友同埋D衫都唔同之外，個樣真係一樣！
之後佢地對一下D資料，確實係兩個唔同o既人，跟住大家都覺得好不可思議...
第一次發生時，我都唔覺係D咩，只當認錯人事件，直到第二次發生後，我就覺得應該有一個人和我個樣係一模一樣 
