1978年, 我老豆帶左我去凱聲(大大百貨對面)睇鐵金剛勇破海底城 (The spy who loved me), 我當時唔明, 又唔係星球大戰, 點解都會全院爆滿. 我老豆仲話睇占士邦唔可以遲入場, 於是我地一家四口一早己入場坐定定. 一開場, 羅渣摩亞滑滑下雪, 比一班人追殺, 以當時既水準黎講絕對係精彩刺激, 最後占士邦飛左出懸崖, 全場觀眾靜曬, 突然間占士邦打開英國旗降落傘, 跟手響起經典既007音樂, 入opening. 呢一幕可以話係果個年代既邦迷既集體回憶. 已我自此亦步我老豆後塵, 成為邦迷.
呢套海底城絕對係經典, 其中Lotus Esprit潛水車更係我至愛. 我阿媽後尾仲買左架Matchbox比我添, 多謝媽咪! (呢架車仔都係響大大買架! 星期日八折!)
占士邦好睇之餘, d主題曲都好好聽, 歌手亦會以能夠唱到邦既主題曲為榮. 其中 For your eyes only更係金曲之中既金曲.
80年代頭, 麗的播番曬所有舊既鐵金剛. 我老豆成日都話辛康納利先係佢最鐘意既邦, 我都承認佢確係入形入格. 但係對我呢種睇海底城、太空城、海龍幫成為邦迷既人, 對羅渣摩亞係有一種情意結.
羅渣摩亞係1985年既鐵金剛勇戰大狂魔(A view to a kill)已經老態龍鍾, 之後既新任鐵金剛(鐵摩達頓、皮雅斯布士南)只算不過不失. 再加上特務片已經拍無可拍, 占士邦片可以話係每況越下.
2006年終於去到第21套Official占士邦片. 新占士邦係響"慕尼克"有出色表現既丹尼爾基克. 好多人話接受唔到佢外型但我自己就幾鐘意. 故事方面就fallback到占士邦剛剛成為007既第一個任務, 叫有d新意. 可能初出道既關係, 占士邦會對女角動真情真係前所未見.
其實現今要拍一套令人覺得故事好既特務片真係好難, 因為拍左幾十年乜野橋都用曬. 但我會覺得呢套戲算唔錯, 起碼肯玩野.
之前麥狄文既叛諜追擊1,2 被譽為新一代特務片既代表作. 呢套新James Bond絕對唔會差過Jason Bourne(叛諜追擊中主角既名字).
你又會鍾意邊個JP多d呢?
