我好細時住過,印象極深刻。果幢樓六層高，無電梯，我住五樓，上落極辛苦（大概三四歲，行樓梯好吃力）。
六樓係山寨工廠，做鞋模的，一開工就成幢樓瀰漫木屑灰塵。
夏天夜晚好多大人（男人）到天台瞓，包括好多唔係呢幢大廈的住客。
屋內又係一條冷巷直通，左邊幾張兩層碌加床，右邊板間房。
水，電費全屋分擔，但多少出入總會有紛爭。所以同樓上大大所講的感情好完全唔同。除咗一兩個打埋算盤係親戚之外，其他的都疏遠，甚至試過嗌交拎菜刀叫警察。
全屋最高紀錄住咗２１人，間屋大概一千平方呎，厠所一個，廚房一個，好多時爭執由此起。
可能最初有騎樓，但我住的時候騎樓已安晒窗成為室內。
最最最神奇係.......幢樓仲未拆,今日（２０２０年）仍然有人住,不過唔再係板間房+碌加床,而係一個單一單位。
