機械人動畫有幾種戰鬥型式：
單拖隻鞦型，例子「大武士」、「鐵甲萬能俠」，即成個基地得你一個有點實力去打敵人，其他的戰友愛美神、波士等美其名是輔助，實際是因戰鬥力不足而拖累埋主角。後來在機戰上，前者有修理後者有補給功能而有點存在價值。
團隊作戰型，最佳例子是「超時空要塞」，如真實軍士般，隊員聽取指令行事。但一條輝也會有反叛期，還與指輝管美沙頂撞，說她是大嬸。所謂：上樑不正下樑歪。藍機麥司般天才橫溢，比上司還出色，好在一條輝是沒機心的人，不然調他往火星當後勤工作。
眾人合一型，即是幾位戰鬥員駕著機體合成一個機械人，戰鬥力大增，例子多不勝數，「陰陽電磁俠」、「宇宙大帝」、「超力電磁俠」、還有十五機合體的「機甲艦隊」，亦是今篇集中想講的題材！
外星人侵略地球，就好似一些麻煩親戚，間唔使走黎搔擾下你，三日唔埋又搞亂市區、氣油廠，加埋主角機在鬧市出絕招，炫耀多種武器，死傷數字難以計算！還有，戰鬥員好像沒有假期，長駐基地。就算有機會都要stand by，通常敵人都會如常襲擊地球，掃主角們興，更談何顧員褔利？如果其中一員請病假，女的遇上唔方便日子咁點算？唔齊人合唔到體，好像無交代過呢種情況…
係一間公司和老細或同事不咬弦可以劈砲唔勞，但合體戰鬥員要轉工唔易，因為呢個行業太專門！唔通份履歷寫「五年駕駛機械人經驗，專長打怪獸，對工作期望係世界和平。」更無跳槽呢個選擇，但可以選擇降格去國家軍事部駕駛戰鬥飛機，如果唔介意一出場就比敵人射爆…所以呢，呢行既流失率頗底。
全隊如果齋男，觀眾會睇得好悶，通常都會加一女性隊員，為大家增添生氣（遐想）。多數都是博士的女兒，其實呢種安排好絕！起碼大家都不敢打她主意，博士能監察著女兒不會出外學壞，不會亂識男仔，亂搞關係…對女角有興趣而又高攀得起的只有男主角，其他人都前塵莫及…
分配工作上也有不協調，未合體前各自可隨心駕駛，只要做好本份。但點解一合體就只但主角一人控制？其他的變作陪坐，頂多是按下掣發射飛彈…如果唔明舉個例子，五個小朋友玩緊「V型電磁俠」超合金，當手拿一號機的喊：「合體！」，其餘四個小朋友乖乖拿出機體，之係比一號機小朋友獨佔整個機械人…
所以，戰鬥員不是大家所想得美好的一份職業，各位小朋友唔好再存有幻想！
[
本帖最後由 acg_kusooo 於 12-10-2008 21:58 編輯 ]
