估唔到一講番舊年單野，即刻有咁多回應…
其實據我所知：
果條友的確是有心想搞，亦都真是傾掂晒數，不過…最後都流產
好事後孔明咁睇番，當時好多安排都唔合理
首先，成個演唱會的安排，其實無點公佈過，而據我了解，主辦單位替十幾個日本人申請了工作簽證，當中除演出的五位歌手，同幾位樂隊成員外，重包括來自日本的燈光同音響技術員…簡單來講，就是主辦者想將成個演唱會照搬過來，除了地點不同之外，一切都跟足日本的形式（當然包括那些為人垢病的地方，如全場企位，排隊入場，不設劃位，先到先得…等等），所以就算當時不斷有人"提醒"主辦單位，咁樣咁樣對銷售不利都好，主辦者都置若妄聞，因為他當時只一心想搞個同日本果便一樣的演唱會
當然負面後果大家都見
其實條友是從未搞過演唱會的，正如他自已都話經驗不足，周圍的朋友亦不斷為他護航，咁點解又會傾得成呢，主要原因是太多人想搞到，包括日本方面，因為大前提是果便其實都好想在香港開，香港呢面亦有人落力促成，所以至俾他入到位，但其實…俾你同我都實傾得成，只要你同日本方面乜都say yes的話
據我所知，果條友是up得出就up的人，點講好呢…如果大家有睇過一套港產片叫AV，入面有一場戲是幾個主角，請個女優經理人去佢地"公司"參觀，個經理人問個關公像是乜，有人就答是大陸某某影展的金像獎…起初以為套戲誇張，但現實原來是有的咁的人
其實當初公佈舊年單野時，果個人好高調咁以主辦者的姿態企出來，重講話點點點…不過，好快他就發現，原來香港除左他之外，重有不少人可以"直通天庭"，於是，好快地他又主動收聲潛水，然而正因為他潛左水，於是就有傳言話呢個是騙局…當然呢個唔係騙局（在當時而言），不過就是為左咁，的人已對他無左信心，有左戒心
再當延期消息一出，想人再對他有信心都難
