from: https://hk.entertainment.appledaily.com/enews/realtime/article/20181109/58834224
【「儍姑」演藝路】關德興契女從粵劇童星做起 陳安瑩︰甘草唔可以脫節
昔日在無綫拍過多部經典劇的陳安瑩，猶記得她在1983年劇集《射鵰英雄傳之東邪西毒》中「儍姑」一角，其次是《天龍八部》中的「天山童姥」，連金庸都讚她演得最貼近原著人物。當年她未夠秤便入行，由粵劇童星做起，與不少大老倌同台，她更是已故關德興師傅契女，從小耳濡目染。中學畢業後，她便加入無綫第8期藝員訓練班，簽約時還要阿媽代簽。時光飛逝，今年是第8期藝員訓練班40周年，陳安瑩仍默默耕耘做甘草演員。論演技她不遜於視帝視后，但她從沒拿過任何獎項，性格樂天的她說︰「入到人心入面，總比起嗰嚿嘢（指獎座）仲大！」
早前陳安瑩在尖沙嘴接受《蘋果》專訪，她最近在網劇《蝕日風暴》中，飾演王陽明媽咪，「佢真係好高大好靚仔，戲入面我老公又高大而我又靚，所以生咗佢咁靚仔，哈哈！」自2012年陳安瑩離開了工作超過卅年的無綫，之後曾轉投王維基旗下的HKTV，可惜開台無望，「嗰種精神好欣慰，後悔？都唔會，喺邊度做戲都一樣，做戲滿足感喺自己度，我先至係最大得着。」幸她還有副業做配音員，「我有做配音，好天搵埋落雨柴。」最近她同鄧萃雯、陳錦鴻合作ViuTV新劇《婚內情》，「見番大家都好開心，非常enjoy。」
談及陳安瑩的演藝路，並非訓練班那時說起，而是她只有幾歲大的童年。當年陳媽媽是鄧碧雲媽媽的契女，陳安瑩從小便稱呼鄧碧雲為碧姨媽。自小生得機靈的她開始學大戲，6、7歲那年跟關德興師傅上契，那個年代的《黃飛鴻》系列，總看到這位童星演出。陳安瑩當上電視台藝員後，在電視城廠內看到鄧碧雲也掉頭走，「碧姨媽問我阿媽，做乜我會咁驚青掉頭走？其實我唔想俾人知，我同碧姨媽�H關係，當時自己唔想靠人，只想靠自己。」
戲行多規舉，長大後她沒有再做大戲，更將其衣箱賣掉。直至中學畢業後，陳媽媽用激將法，令她重投演戲，報讀第8期藝員訓練班。轉眼間，今年是訓練班畢業40年，同期有艾威、黃造時、景黛音、梁潔華等，陳安瑩說︰「40年啦！我哋一班同學，下個月會聚一聚。」最近她看回當年訓練班的片段，她笑稱︰「嗰時我瘦幾多，睇番條片，人哋話最認得就係我把聲，哈哈哈。」
天生性格樂觀，陳安瑩多年來演過不少閒角，當中以劇集《射鵰英雄傳之東邪西毒》的「儍姑」一角，最令人留下深刻印象，至今劇集經常在大陸重播又重播，6歲至70歲的大陸觀眾都認識這位「儍姑」。難得陳安瑩對演閒角，仍不斷自我要求，「有時演戲企後面，對白唔到我講，但睇人哋演繹都係在職培訓，我希望自己有進步，即使做甘草都唔可以脫節。」她的演技毋庸置疑，對獎項更看得更淡，「雖然當年冇呢啲獎，但係入到人心入面，比起嗰嚿嘢（指獎座）仲大。」
對演戲、工作抱樂觀態度，對感情她同樣樂觀。甚少談感情的她，其實有位拍拖超過30年的男朋友，問她為何不婚？她說︰「以前阿媽話唔過30歲唔好結婚，到過咗30歲結咩鬼婚，我成日同佢講，如果呢一刻唔同我一齊，鍾意咗第二個，我真係冇所謂，有人煲湯俾佢、照顧佢，點解唔愛屋及烏呢？多年來�H相處，大家有好大自由度，最緊要開心過每一天。」
