玩咗10幾年嘅Bandai「超合金魂」，屈指一算已出咗60幾款合金機體，偏偏仲有人氣卡通未被商品化，之唔係70、80後都好鍾意嘅《百獸王》及《機甲艦隊》囉！由於當年「拉臣」賣咗去外國，港人想玩呢兩套動畫嘅玩具，惟有高追POPY合金。
本土勢力「Miracle Production」早前終於攞得呢個矜貴版權，快過日本推出自家合金「Voltron
Vehicle Force」，設計概念係向懷舊合金致敬，15部機體除可結合成Dairugger XV，亦都跟足POPY可以分成海、陸、空三款形態，原味極濃！
90後未必認識嘅《機甲艦隊》，日本首播年份係1982，劇情構思深受《Star Wars》及《Star Trek》等西方科幻電影影響，故事背景講述人類為咗探索外太空，尋找適合居住嘅新星球，於是組織太空探險艦隊，並由隊長劍飛率領14名隊員，各自駕駛Vehicle Force保衞船團，及後面對杜摩帝國襲擊，15部機體合體成巨型機械人Dairugger XV（港稱：15機合體）迎戰，堪稱有史以嚟合體數目最多嘅機械人。
含金量叻過日本貨
除咗大合體，15部Vehicle Force仲分為海、陸、空三隊，各有五部機體，分別結合成聯隊形態嘅「天鷹隊」Air Team、「海龍隊」Sea Team及「地虎隊」Land Team。Miracle Production版本亦逐一做到，當中以Air Team嘅組合最簡單，只係將兩部直升機裝喺運輸機兩側，另外兩部戰機就安插於運輸機嘅前端及頂層，最後轉動運輸機履帶就成事；Sea Team就由潛水艦接合兩棲坦克，對稱結合喺深潛機兩邊；至於Land Team最複雜，事關要揭開裝甲車嘅全部外甲，再拉出裏面嘅榫位，先可以套上變成拳頭及腳掌嘅戰車，還幸所有接駁位都採用彈弓榫扣及磁鐵，確保變身後唔易鬆脫。
講到最有Gimmick嘅地方，始終係「15合一」嘅Dairugger XV，當中Air Team直接構成頭部、上身以及上臂，Sea Team嘅對稱潛水艦就要先收起艦首，深潛機就獨立拆出並緊扣上身，變成可以扭動嘅腰部關節，最後Land Team嘅裝甲車變成髖關節，其餘戰車成為拳頭及腳掌。呢款本地薑出品嘅15部機體，全部都加入Diecast物料，墜手程度相當高，可以話比起日本嘅老牌超合金更加足秤。
可動能力大翻新
無論造型以至合體方式，Miracle
Production版本都似足當年嘅POPY合金，擺明向前作致敬，不過咁講法，又使乜Miracle
Production出多次？稍安毋躁，想當年嘅POPY合金可動性唔高，除咗頸、肩及手肘可以輕微轉動外，其餘部分都唔多郁到，Miracle
Production就嚟個大翻新，最有誠意就係下身以至雙腳嘅連接處，由於組件扭動部分最多，為咗固定受力位，轉動處都用咗結實嘅齒輪關節，接駁處嘅榫柱又特別粗長，就連套上腳掌嘅部分都多出一組關節，藉此加強接地性，從此雙腳終於郁得到，唔再係兩條樁柱徒具虛形。至於上身膊頭部分，追加咗延伸關節，令上臂可以向前傾，直升機內側亦加設關節，可以擺到聳肩甫士。武器方面就有兩把長劍、一支長矛，仲有長鞭、短柄嘅雙刃槍及輪刃，長矛仲係金屬製成，又有電鍍塗層，提升質感，隨盒又有專門對應輪刃及投槍所用嘅造型手掌，擺出招甫士就更見自然。
Video 介紹
