今日搭由藍田到觀塘嘅小巴﹐遇到一個與眾不同嘅司機。
以往我對小巴司機嘅印象﹐都係惡死､無禮貌﹐淨係識叫你「俾左錢先呀！」同OO(一個動詞一個助語詞﹐自己填。)啲唔記得左嗌「有落」嘅呀伯師奶同毒男。我自己都受過好多唔禮貌嘅待遇。
但今次﹐我目睹一件足以做一集《霎時感動》嘅事。我上車冇耐﹐一個伯伯喺下個站落車﹐拐下拐下咁正想到司機位俾錢﹐司機揮一揮手︰「得啦阿伯﹐唔駛俾啦。」伯伯呆一呆﹐冇問啲咩就落左車。
我開頭以為呢個阿伯係一早俾左錢又唔記得左﹐但之後再有兩個老人家落車時﹐個司機又再次揮揮手︰「唔駛啦阿婆﹐落車啦。」阿婆︰「咁得意？」司機答︰「係呀﹐好得意架！」之後露出左個好得戚嘅笑容。
如果成日搭小巴﹐都應該會明白︰小巴佬會對住你笑﹐即係等如石堅認錯！
而佢之後講果句更加令我震驚︰「80歲坐我車﹐都唔收錢架！」
我望住佢﹐生平第一次﹐發現坐喺司機位嘅係一個有名有姓､有血有肉嘅人﹐而唔再只係一個負責運送乘客嘅社會角色。
佢睇落都不過係一個五十幾歲嘅發褔中年人﹐居然敬老到如此地步！
落車時我忍唔住問左佢一句︰「個個80歲你都唔收佢錢架？」佢一聽到﹐又露出一個自豪得黎好慈祥嘅笑容︰「時不時啦﹐幾十歲都費事收佢地錢。」
我真心咁讚左佢一句︰「你真好人。」
臨落車前我望左佢張證一眼﹐呢位咁與眾不同嘅司機﹐有個好「法海無邊」嘅名字︰摩祖思。 ( X摩祖師？！)
落左車﹐等緊過班馬線果陣﹐呢架小巴再次經過我面前﹐呢位摩大哥居然又特登同我揮手講拜拜。
如果大家下次搭呢架藍田<=>觀塘小巴﹐咁啱撞到呢位(？)摩祖思大哥﹐不妨俾隻手指公佢﹐鼓勵香港多啲呢啲好人好事啦。
**
轉貼飛士卜 "宮千栩分享了 Hugo Tse 的相片"。
