(Information extracted from 維基百科)
am_Tin_cityscape.jpg">
am_Tin_cityscape.jpg>
am_Tin_cityscape.jpg">
挨晚時候嘅藍田
藍田喺香港新九龍嘅東部，響觀塘東面，秀茂坪南面，油塘北面。藍田大部份地方都係住宅區，另外都有幾個出名嘅購物商場。行政上係觀塘區嘅一個部份。
大部份藍田居民都係華人，不過自從地鐵同東隧通車之後，由藍田過海返太古城同鰂魚涌返工變得好方便，而且藍田相對於太古城嘅樓價較低，因此喺1990年代初有大量日本僑民湧入本區，並且入住幾條新落成嘅私人屋村。從此，日本人同埋歐洲人喺藍田就唔算少見。佢地多數住喺匯景花園同埋麗港城。
1841年香港島變做英國殖民地之前，藍田係九龍灣鹽田嘅一部分，唔同時期隸屬東莞縣或者新安縣之下。由於九龍灣鹽田鹽產豐富，於是海灣附近嘅居民慢慢有錢。慢慢，鹹田山成為咗村莊。咁樣，鹹田村開始有人耕田同埋附近蘇茅坪有人開礦。蘇茅坪又稱掃墓坪，因為名稱忌諱最後被改名秀茂坪。鹹田山逐漸成為一個漁產，農產及礦產會集嘅村莊。
呢個盛況持續咗多年，直到九龍新界都變做殖民地。英國統治下，九龍灣無人理鹽田，改建為啟德機場，而鹹田村唔再產鹽。皆因「鹹」字嘅廣東話發音好似個「藍」字，逐漸咁畀人叫咗做藍田村，攞咗「藍田生玉」嘅意思。1960年代末港府喺藍田山上興建咗公屋藍田村，自此藍田村便成為藍田嘅代名詞。藍田村喺1990年代同觀塘其他公屋一樣需要重建，但佢嘅發展一直都比觀塘其他地區好，好似1989年地鐵藍田站正式啟用就係一例。
隨著三個主要運輸基礎設施－觀塘繞道、東區海底隧道同埋地鐵落成，好多人跟住搬入藍田。宜家藍田係香港一個主要嘅交通交匯點。
