宇多田 光（日文：宇多田ヒカル，拼音：うただ ヒカル / Utada Hikaru；1983年1月19號—）喺美國紐約出世，身高158厘米，日本流行女歌手。阿媽藤圭子係歌手，阿爸宇多田照實係個音樂總監，宇多田一家名為U3喺1993年發表大碟「THE STAR」，事務所名為U3 Music。宇多田光喺2002年結婚，老公紀里谷和明係一個導演，曾經為宇多田光拍攝多首歌嘅
V。所屬唱片公司係EMI Music Japan Inc.（前身係東芝EMI）（宇多田ヒカル）同環球唱片旗下嘅Island Records（Utada）。佢嘅出道大碟「First Love」係日本音樂歷史上最高銷量大碟，其後嘅「Distance」同「DEEP RIVER」亦打入日本銷量最高銷量大碟十大位置，所有日文原創專輯全球銷量都過百萬張。英文大碟喺日本嘅銷量亦都破百萬。年紀輕輕已經成為廿一世紀日本樂壇天后級歌姬。
喺2001年3月28日「Distance」推出同日，另一個日本頂尖歌姬女皇濱崎步同步推出精選大碟「A BEST」引發日本樂壇史無前例嘅歌姬銷量戰，史稱「328唱片大戰」。
2007年3月3日宇多田光突然喺個人部落格上宣布離婚。佢話同前夫紀里谷和明喺呢四年半都成長咗唔少，亦都慢慢咁改變。兩人喺未來理想同夫妻關係上開始有分歧，經過懇談後決定離婚。佢哋喺3月2日辦好手續。佢最後重祝福前夫繼續活躍工作。
