蘋果日報 - 20111104 - 隔牆有耳：譚玉瑛 網界封民主女神

陪住幾代香港人度過童年嘅譚玉瑛姐姐，正式取代政務司前司長陳方安生同社運女神周澄，

被網界封為「香港良心」同「新一代民主女神」。係近日嘅《放學 ICU》，佢透過選班長故事，

話畀小朋友聽點解要反對替補機制，灌輸小朋友同唔好因為「有嘢食」而投票畀提供利益

嘅候選人，唔係就同賄選無分別。呢啲片段都喺網上瘋傳，為 CCTVB洗刷污名。

告訴小學生替補機制唔公平

前日《放學 ICU》嘅諸氏家庭，內容講述小學生女主角諸柔所屬班別嘅班長退學。

班長出缺，同學小璇叻唔切，恃住自己喺上次班長選舉時得票第二高，自以為可以

自動替補接任班長。但由譚­玉瑛姐姐飾演嘅 Miss Tam就話應該要重選。
Miss Tam教同學仔，由上次選舉中第二個得票嘅人替補做班長「梗係冇咁好」：

「每一次選舉時，每一個同學嘅諗法都有唔同㗎！所以結果咪會唔同囉。再選過係最公道！」

呢句對白令­譚玉瑛姐姐成為網絡大紅人。

高登仔即時封佢做香港良心，又擔心 CCTVB向佢開刀：

「譚玉瑛會唔會分分鐘連節目都無得做㗎」，

有人更警告 TVB唔好亂搞譚王瑛：「有 Dicon真係唔掂得！放學 ICU係香港良心」。

故事仲未講完，謀住班長一職嘅小璇，不斷向同學送上波板糖、朱古力等零食，

希望小朋友投佢一票，但係同學都睇穿小璇想以零食賄選，

寧願投畀平日不斷服務同學嘅女主角諸柔。­小朋友話：

「選舉係要公平公正，我哋係唔會因為利益而影響決定」。

八方噚日多次聯絡譚玉瑛姐姐，但佢已將電話飛咗去留言信箱。

除咗譚玉瑛，高登仔仲大讚寫故事嘅編劇，又強烈要求將《放學 ICU》

取代《東張西望》、同埋膠到震嘅電視劇，仲話呢集《放學 ICU》

好過 ICAC嘅廣告。但亦有網民慨嘆，「 TVB淨係敢用兒童節目諷刺時弊，都幾可悲」。