亞視內部近日再度颳起 8級颶風，但今次不是裁員，而是專向藝員開刀，以新制大幅度削減藝人騷錢和工作量，受影響員工的底薪跌至 6,000元的新低點，以現時的生活指數和經濟不景情況而言，着實令員工生計大受影響。亞視之寶鮑起靜昨日開腔為同事請命，懇請亞視收回成命。
台灣旺旺集團老闆蔡衍明入股亞視後，早前更委任愛將胡競英做行政總裁，藝人以為從此有大水喉射住，怎知近日藝員部忙於向即將約滿的藝人開刀，大幅度削減他們的騷錢和騷的數量，變相狂減人工。
劉錫賢首當其衝
亞視這次減薪幅度由最少的 3分 1到一半不等，計算機制會視乎藝人的知名度和資歷而定。減薪風吹正亞視，令一眾藝員人心惶惶，近日有份在口碑不錯的節目《香港亂噏》中扮鬼扮馬的劉錫賢，首當其衝遭減騷。本月底約滿的劉錫賢剛於上周落筆簽新約，他昨日直認受減薪影響，他說：「我減咗 1個騷，同亞視簽返 1年生約， 1年死約。始終喺亞視咁多年，做生不如做熟，個減薪幅度我可以接受。」
雖然亞視內部早已用裁員方案精簡人手，只保留為數不多的班底藝人，但因亞視近年不停播放外購劇，自家製作寥寥可數，直接影響旗下藝人工作量，令他們大部份被投閒置散，白支人工，亞視於是重新訂出新約的人工計算方案，舉例而言，過往底薪 9,000元的藝人，合約定明每月要做 8個騷，即每個騷錢 1,125元，每爆一個騷亞視便多付 1,125元薪金，而新制既減藝人每月出騷次數也減騷錢，即由 8個騷減到 6個騷，騷錢也由 1,125元減到 1,000元，結果底薪僅得 6,000元。
鮑姐籲收回成命
亞視為求養兵千日用在一時，有意仿效無綫用一騷制綁死藝人，但亞視騷錢偏低，視乎藝人知名度由 1,000元至 6,000元不等，新制實施後，藝人最低底薪將會跌至 6,000新低，藝人均對減薪新制敢怒不敢言，紛紛採取拖字訣，希望在最後一分鐘爭取合理待遇。
亞視較為人熟悉的藝人鮑起靜（鮑姐）、陳啟泰、吳亭欣（ LuLu）、林韋辰和袁文傑等，今年內將陸續約滿，他們都已得知減薪新制，資歷最深的鮑姐謂希望亞視可以體諒現在經濟巿道差，她昨日在電話中苦口婆心地說：「公司𠵱家淨係開綜藝節目，造就男藝人機會多啲，反而女藝人工作量唔多，影響收入，仲要減人工，佢哋真係好慘。」將於 11月約滿的鮑姐又說：「我已經減咗好多，我簽得唔多騷，如果再減埋騷錢，公司就唔使出糧畀我，希望公司唔好減人工，𠵱家環境咁惡劣。」
身為亞視小花的吳亭欣下月初約滿，至今仍遲遲未動筆簽新約，相信與不滿減薪幅度有關。被問到減薪的百分比時，她昨日在電話中吞吞吐吐地說：「同大圍一樣囉。」她指出女藝人既要置裝，加上亞視搬入大埔新廠房後交通不便，令車費支出增加，她說：「減薪會影響藝人嘅生存能力。」
陳啟泰靜觀其變
同樣下月約滿的陳啟泰則稱公司未主動聯絡他，會靜觀其變，他說：「等公司主動 call我至算。」尚有兩個月才約滿的袁文傑昨日則說：「我聽過公司要調整藝人薪金，要睇佢開出嘅條件先考慮，咪當同公司共度時艱，睇吓可唔可以減咗人工，但又安排番多啲出鏡機會。」林韋辰說：「試問邊個打工仔鍾意聽減人工呢 3個字，聽到心情梗有影響。」不過他表示明白在商言商，若亞視減薪目的是「整靚盤數」，他願意配合，他說：「不過減咗藝人騷錢其實可以加番工作量，咁樣條數一樣好靚。」
記者昨日致電向亞視高層葉家寶求證減薪新制時，他說：「每次同藝人傾新合約，都會有新嘅處理方法，要睇個別情況，有啲仲加咗騷㖭。」是否有藝人的底薪跌至 6,000元新低點？他說：「我哋製作少咗，未來吸納唔到咁多藝人，咁咪唔使簽咁多騷，雖然佢哋人工少咗，但公司會幫佢哋接番多啲出面嘅工作賺外快。」採訪：林妃
話你知：新節目贏口碑
亞視積弱多年，雖有張永霖上場改革及台灣大水喉射住，但依然未見起色，早前更以陳年舊台劇放在黃金時段當新劇播。不過亞視銳意求變卻是有目共睹，就如近日推出的節目《香港亂噏》及《亞洲星光大道》均是水準之作，前者有林超榮和盧海鵬孭飛，雖然平均收視只得 4點（約 25萬觀眾），但阿鵬的搞笑片段紅爆互聯網，贏盡口碑；《亞洲星光大道》則有 8點收視（約 50萬觀眾），普遍人認為比無綫同類型節目《超級巨聲》更耐看。
娛樂資料庫：亞視屢次大裁員
時間：今年 5月 13日
經過：因應終止 24小時新聞頻道，裁減了 36人，包括新聞部及工程部，當中 4人是記者，包括資深體育主播黃文傑。
時間：今年 2月 12日
經過：大裁員 207人，單是美術部便被裁逾 100人，其他重災區包括新聞部、電腦部及綜藝節目部。
時間：去年 11月 14日
經過：裁員共 47人，分別來自六、七個部門，其中包括服務了 18年的資深員工。
時間：去年 11月 3日
經過：生產及製作部門共 16人被裁。
資料來源：《蘋果》資料室 
