阿９９９大哥及各位 oldcake fans：
小弟童年時就在得如樓後面的砵蘭街住，後來搬左去雲來荼樓對面住，所以對呢兩間茶樓好有感情．各位大大，我有以下補充．
１． 得如樓在７０年代十分著名，因為佢係極少數自己有電梯的茶樓．
２． 最初佢地面果層分別有甜品部（主要賣糖水）及禮餅部（主要做月餅會同嫁女餅）；後來可能做唔住，於是停左，淨翻茶樓．
３． 得如樓各層正如上面大哥所說係有不同階級，主要以唔同的茶價來分別．
４． 大大講的豬籠餅其實係做月餅會時的贈品，只不過係造月餅時用剩的粉來做，完全無味．
５． 雲來的所在地並非而家的朗豪坊，而係再落一條街，即係豉油街，熟食檔對住二樓係投注站果幢樓就係佢原址．
６． 當年雲來門外有大牌檔，同報紙檔，報紙檔出名在拍拖報，甚至係由顧客自己配搭的拍拖報．
７． 雲來酒樓一直堅持用人手托住個大盤再用兩條帶掛住係頸下黎叫賣，唔用當時已甚盛行的車仔，令坊眾甚為欣賞．
