見到網上有唔小關於『屈機』一詞起源既討論, 我呢d由細打機打到大既又點可以唔講埋一份呢.
70年代尾、80年代初, 當時既街機設計比較簡陋, 有好多設計上既漏洞或者bugs. 唔小玩家為左果一蚊雞抵玩d, 係咁不繼循環利用呢d漏洞(or bugs), 有人甚至可以一蚊由朝打到晚. 呢種做法叫左『打 Formula』, 又簡稱『打方』.
經典例子 : 有d遊戲入面某d位會有"2UP"食, 一食左會獎兩隻. D細路就諗到食完即刻自殺, 好多遊戲會係死左之後fallback番一小段路, 咁再經過"2UP"位又再食, 又再自殺. 不繼循環直至有九十九集先至離開! D細路真係醒!
機鋪老細當然唔容許你咁做, 早年好多機鋪會寫住"嚴禁打方, 違者熄機"
去到80年代尾、90年代初, 街霸誕生, 好多人打電腦既時候都會『打方』, 久而久之, 呢種方法被稱為『屈方』 (用Forumula去屈)或『屈機』 (用Formula去屈部電腦/遊戲機).
e.g. 你打街霸, 對電腦係咁屈(屈波升, 屈撻), 可以叫『屈方』或『屈機』. 但你打對戰時, 用formula屈對手, 只可以叫『屈方』, 唔可以叫『屈機』. (因為你唔係屈緊電腦, 係屈緊人.)
及後, 『屈機』一詞大為盛行, 甚至冇人再用『屈方』呢個term, 無論屈人定屈電腦都統一叫『屈機』, 打街霸第二集對打時如果對手係咁屈你, 你會話 : "喂! 唔好再屈機啦下!"
再及後, 『屈機』一詞成為普羅大眾既詞彙, 仲進化到可以用黎做形容詞.
形容詞使用例子 :
"嘩! 你好『屈機』姐!"
"利物浦出高佬高樂治, 然後係咁放高波入禁區真係好『屈機』喎!"
