最有印象係晶報有個叫”通天曉”嘅一整版或半版報紙嘅百科專欄，我諗”通天曉”嘅意思係宣傳佢自己”天文地理文化音樂機械電子．．樣樣都會樣樣都曉”咁意思啦．．
，可以俾讀者寫信，去問各式各樣嘅古怪問題！
當年７０年代打後，一般市民不太富裕，不易獲得各式各樣知識；特別係我呢個低年級小學生，所以就成日煲吓呢個”通天曉”專欄去學嘢；後來試過中學時（８０年代打後）寫信去問佢問題，佢又可以好詳細好認真咁回覆我！
雖然問佢問題時，敬啟者係寫”通天曉先生”，但我相信佢地唔只一個人！佢地真係厲害到近乎讀者問咩嘢，佢地就真係俾到答覆！例如較熱門嘅Air Supply, 甚至Yazoo呢Ｄ較冷門樂隊名，佢地都知道！
連手作ＤＩＹ嘅機械人都有電子線路圖同機械圖刊出嚟，教讀者點做！（雖然功能只算好一般．．）但係在完全未有互聯網嘅原始年代，佢地仍然可以搜尋到大量各式各樣資訊，真係好勁抽！！ 
最記得Ｄ讀者問完問題，必定補一句：”祝 貴報蒸蒸日上！”蒸蒸日上呢個成語，我就係咁學返嚟！
而家諗起，我都好心懷感激當時呢班做報紙編輯嘅叔叔伯伯
（如果現時佢地仍在世的話．．），雖然呢Ｄ對別人嚟講，係微不足道的一樁小事；但對於當時嘅我，就好有意義！！
係報紙出版咁繁忙嘅工作之外，仍願意抽空閒時間幫讀者，搜尋資料同認真寫出回應，回覆佢地Ｄ古怪問題．．．（當年無ＰＣ無ＷＯＲＤ，改字改文稿執字粒唔容易．．
）
真係好感謝 晶報嘅咁多位叔叔伯伯！
而家回想，晶報嘅”通天曉”專欄，都可算係當年嘅報紙版ＧＯＯＧＬＥ！（雖然讀者落下嘅搜尋，要至少三星期才有回覆！ ）印象中似乎無其他報紙可以俾讀者問任何問題．．．通常都係只可以問專門一Ｄ嘅：例如愛情，醫療等等！所以晶報當時嘅意念，都算好先進．．
