早前係某壇有網友認為舊時嘅歌詞好過家陣好多, 大致上啱, 七十後, 九十前嘅中文歌好詞固然唔少, 但係亦有好多係敗筆連篇, 以下係幾個正面與反面教材:
劣詞:
「誓要將我苦難化為悲憤」呢句就夠晒九唔搭八, 但係霑叔唔知點解到死嗰日都唔肯改??? 我暫且將佢改為「誓要衝破苦難, 解除厄困」。
「別離容易見就難」(霑叔), 「見就難」刺耳之極, 成首歌嘅意境就衰喺第一句手上!!!
「踏著前路兩家互守望, 不必要怕路長」(鄭國江), 個「要」字完全係畫蛇添足, 作文寫成咁肯定俾先生扣分, 改為「不必怕路長」,「必」字唱兩個音就掂晒!!!
「只盼若能夢中會, 難捨分飛心未變」(許冠英),「只盼若能夢中會」解唔通, 扮文藝但係又唔夠功力, 改為「只盼夜闌夢中會」還勉强可以接受。
佳句:
「明日對花憶卿面」(Sam Hui), 以花比人, 冧死女!!!
「天造之材, 皆有其用」(Sam Hui) 就將「天生我材必有用」改寫得好靚!!!
「花依舊玉人杳」(Sam Hui) 出自「人面不知何處去, 桃花依舊笑春風」, 又係絕妙嘅改寫!!!
「湖海洗我胸襟, 河山飄我影踪」(霑叔), 夠豪氣夠詩意!!!
歡迎各位餅友討論分享。
